БИШКЕК, 2-май. — Sputnik. Борбор калаада унаа сүзүп комада жаткан окуучу балдардын бири Алимбек Сыранов сүйлөп, өзү тамак иче баштады. Бул тууралуу Sputnik Кыргызстан маалымат агенттигине Саламаттык сактоо министрлигинин маалымат катчысы Жылдыз Айгерчинова билдирди.
"Алимбек толук түрдө комадан чыга элек. Бирок акырындык менен өзүнө келип дарыгерлер менен жакындары суроо берсе жооп берип жатат. Буга чейин ал тамакты зонт менен ичсе, азыр кичинеден өзү жеп калды. Бала учурда реанимация бөлүмүндө жатат", — деди Айгерчинова.
Эскерте кетсек, 21-апрелде күндүз Бишкек шаарындагы Бакаев жана Ремесленная көчөлөрүнүн кесилишинен эки окуучуну автоунаа коюп кеткен. Милициянын маалыматына ылайык, балдарды сүзгөн Mercedes Benz үлгүсүндөгү машинанын айдоочусу из жашырып кеткени аныкталган.
Ал эми балдар ооруканага оор абалда жеткирилген.
