БИШКЕК, 28-апр. — Sputnik. Мамлекеттик жаштар иши, дене тарбия жана спорт агенттиги Улуу Жеңиштин 72 жылдыгына карата спорттук иш-чаралардын программасын жарыяларды.
Борбор Азиянын тогуз коргоол боюнча кубогу
6-майдан 11-майга чейин улуттук китепканада Борбор Азиянын тогуз коргоол боюнча 6-кубогу өткөрүлөт. Ага Бишкек, өлкө аймактары жана жакынкы коңшу өлкөлөрдөн спортчулардын келиши күтүлүүдө. Мелдеш аялдар, эркектер жана 12 жаштан өйдө курактагы кыздар-балдар арасында уюштурулмакчы.
Кыргыз күрөшү боюнча республикалык турнир
Республикалык деңгээлдеги мелдеште Бишкек, Ош шаарларынын жана өлкөнүн жети дубанынын балбандары күч сынашат. Спортчуларды каттоо жана салмагын өлчөө Спорт ордосунда 8-майда болот.
Ат оюндары
9-майда борбор калаадагы "Ак-Кула" ат майданында Жеңиш күнүнө жана СССРдин эл артисти Сүймөнкул Чокморовдун, белгилүү каскадер Үсөн Кудайбергеновдун элесине арналган ат оюндары өтөт.
3-май күнү саат 17:00дө чучу кулак кармалып, 4-майдан 7-майга чейин көк бөрүнүн тайпалык этаптары болот. Үчүнчү орун үчүн мелдеш жана финалдык оюн 9-майда тартууланмакчы. Мындан сырткары, майрам күнү тат чабыштын тогуз түрү уюштурулуп, эр эңиш жана салбуурун болмокчу.
Иш-чаранын алкагында "Тайманбас" федерациясынын каскадерлору жана спортчулары да өз өнөрлөрүн тартуулашат.
Ипподромдо 9-май күнү өтө турган мелдештердин программасы:
- 08:30дан –09:30га чейин — эр эңиш оюнунун финалы;
- 09:30дан –11:00гө чейин — көк бөрү (үчүнчү орун үчүн мелдеш);
- 11:00дөн –11:30га чейин — салбуурун;
- 11:30дан –12:00гө чейин — каскадерлор өнөрүн тартуулайт;
- 12:00дөн –13:30га чейин — көк бөрү (финал);
- 14:00дөн –18:00гө чейин— ат чабыш (тогуз түрү).
