БИШКЕК, 25-апр. — Sputnik. Борбор калаада унаа сүзүп кеткен окуучу балдардын бири азыркыга чейин комадан чыга элек. Бул тууралуу Sputnik Кыргызстан агенттигине шаардык балдар ооруканасынан кабарлашты.
Эскерте кетсек, 21-апрелде күндүз Бишкек шаарындагы Бакаев жана Ремесленная көчөлөрүнүн кесилишинен эки окуучуну автоунаа коюп кеткен. Милициянын маалыматына ылайык, балдарды сүзгөн Mercedes Benz үлгүсүндөгү машинанын айдоочусу из жашырып кеткени аныкталган.
Ал эми балдар оор абалда ооруканасына жеткирилген.
"Балдардын бири ооруканага түшө электе эле комада эле. Азыр реанимацияда жатат. Экинчи бала нейрохирургия бөлүмүнө которулду", — деди дарыгерлердин бири.
Доктурлар азыр анын абалы жакшырып келе жатканын белгилешти.
