БИШКЕК, 24-апр. — Sputnik. Өзгөчө кырдаалдардын алдын алуу жана анын кесепеттерин жоюу иштерин күчөтүүнү премьер-министр Сооронбай Жээнбеков селектордук жыйында тиешелүү органдарга тапшырды.
Жээнбеков акыркы мезгилде табигый кырсыктардын саны өсүп жатканына токтолуп, элдин коопсуздугу үчүн керектүү каражаттарды мобилдештирүүнүн зарылдыгын айтты.
Өзгөчө кырдаалдар министри Кубатбек Боронов жыл башынан бери республикада табигый жана техногендик 206 кырсык катталып, мындан 266 миллион сомдон ашуун зыян келтирилгенин билдирди.
"Өкмөт башчы Финансы министрлигине өзгөчө кырдаалдын алдын алуу жана анын кесепеттерин жоюуга каражатты өз убагында жана толук бөлүүнү тапшырды. Мындан тышкары, аймактарды байланышсыз калтырбоо максатында табигый кырсыктардан улам тосулуп жабылган жолдорду тез аранын ичинде тазалоонун зарылдыгы айтылды", — деп жазылат маалыматта.
Мындай кеңешме ай сайын өтүп турары белгиленди.
