БИШКЕК, 14-апр. — Sputnik. Шаардык мэрия Жибек Жолу проспектиси менен Курманжан датка көчөсүнүн кесилишиндеги арыктарды тазалайт. Бул тууралуу Sputnik Кыргызстан агенттигине турак жай коммуналдык чарба башкармалыгынын жетекчиси Канатбек Эшатов билдирди.
13-апрелде жааган жаандан улам аталган көчөлөрдүн кесилишиндеги жолду суу каптап кеткен. Жолдон аккан суу тротуарларды каптап, ал жактан аңдарга толуп, ары-бери өткөндөр ага түшүп кетип жатышты.
Эшатов аталган көчөнү суу эки жагдайда капташы мүмкүндүгүн айтты. Биринчиси, аймактагы арыктарды караган ишкана суу кетчү тешиктерди бетон менен бүтөп салышы мүмкүн, же арыктардын ичи толуп калган.
"Жолдун аркы тарабындагы арыктар оңдолуп жатат. Суу толуп калган жерге жумушчулар жете элек. Азыр адистер ал жакты карап, көйгөйдү чечет", — деди ал.
Ал эми "Бишкекасфальтсервис" муниципалдык ишканасынын өндүрүш жетекчиси Жумакадыр Алымбаев тротуардагы аң-чөнөктөрдү алардын кызматкерлери асфальт менен толтуруп таптай турганын айтты.
