Нурбек Мурашев: дыйкан-фермерлерди колдоого 7 млрд. сомго чейин насыя берилет
"Айыл чарба тармагын каржылоо-5" долбоорунун алкагында жалпы 7 миллиард сомго чейин насыя берилет. Бул тууралуу Айыл чарба, тамак-аш өнөр жайы жана мелиорация министри Нурбек Мурашев аталган долбоор жана айыл чарбасын кайра иштетүү, өнөр жай тармагын колдоо боюнча маалымат жыйында билдирди.
Анын айтымында, бүгүнкү күндө жазгы талаа иштерине 1 миллиард 241 миллион сом насыя берилди.
"Азыркы тапта насыя берилип жаткан алты банкта жалпысынан 2 миллиард 100 миллион сом каражат бар. Дыйкандар мал чарбачылыгына, өсүмдүк өстүрүү тармагына 10 пайыз, кайра иштетүү тармагына 6 пайыз жылдык үстөк менен 36 айга насыя алууга мүмкүнчүлүгү бар", — деди Мурашев.
Аталган жыйында тийиштүү документтер толук болсо, үч күндүн аралыгында насыя алууга болору белгиленди.
