БИШКЕК, 26-мар. — Sputnik. Кыргызстандын президенти Алмазбек Атамбаевдин кызы Алия Шагиева жаңы төрөгөн ымыркайынын сүрөтүн социалдык тармакка жарыялап, ошол жерге эле бабасы Ноорузбай тууралуу пикирин жазды.
Ал уулунун колу тартылган сүрөттү интернетке коюп, алдына пикирин калтырган. Жаш эне өткөн жекшембиде эле атасынан (Алмазбек Атамбаев — ред.) Ноорузбай аттуу бабасы Нооруз күнү туулган деген маалыматты уккандыгын бөлүшүптүр. Кыздын айтымында, буга абдан таң калган.
"Бул учурдан тарта бардык жан бүткөндүн жаңылануусу башаталат деп ишенүү керектигин жана күндүн жазгы жана күзгү теңелүүлөрү адамдын канына өзүнүн таасирин тийгизерин жолдошум экөөбүз отуруп алып окуп чыктык. Анын үстүнө 20-март Жердин күнү болуп чыкты. Бул мезгилде ар бир адам баласы өзүбүздүн үйүбүздү сакташыбыз зарыл экен. Менин таңгалганым, дал ушул күндөрү, 19унан 20-мартка караган түнү толгоом башталды… Төрөт туурасында кийин өзүнчө жазам. Себеби, төрөт — улуу жана ыйык, болуп көрбөгөндөй башкача бир учур экен. Аны эки ооз сөз менен айтып бере албайсың", — деп баяндаган Шагиева.
Мындан сырткары, жаш эненин "уулубузду менин көкүрөгүмө жаткырганда эчкирип ыйлагым келди" деген саптары бар экен.
Президенттин кызы Алия Шагиева 2016-жылдын сентябрь айында турмушка чыккан. Жолдошунун аты — Константин Рязанов.
