БИШКЕК, 26-мар. — Sputnik. Ош шаарында бүгүн ITF таэквондо боюнча шаардын ачык биринчилиги өтүп, ага 150 чукул спортчу катышты. Бул туурасында Ош мэриясынын маалымат кызматы кабарлады.
Спорттук таймашка 21 салмак категориядагы 6 жаштан 18 жашка чейинки спортчулар катышты.
Иш-чара бир нече максатты көздөй турганын башкы калыс, машыктыруучу Фарух Садыков айтып берди.
"Мелдештин негизги максаты — республикалык, эл аралык таймаштарга Ош шаарынан мыкты спортчуларды жана курама командаларды тандап алуу. Аны менен кошо эле спортту калк арасында үгүттөө, аларды спорт менен машыгууга үндөө", — деди ал.
Спорттук мелдешти көрүүгө келгендерди өзгөчө, жаш балдардын кармашы таң калтыргандай болду. Залда отургандар аларды колдоп, кол чаап сүрөөнгө алып турушту.
Беттештин жыйынтыгында жеңүүчүлөргө шаардык дене тарбия жана спорт комитети тарабынан медалдар, дипломдор жана баалуу белектер ыйгарылды.
