БИШКЕК, 22-мар. — Sputnik. Ысык-Көл облусунун Ак-Суу районунун Челпек айылдык кеңеши тарабынан демилгеленген идея ишке ашып, эми Кыргызстанда "Апрель революциясынын баатырлары" деген аталыштагы чоку пайда болду.
Мындай демилге учурда апрель окуясынын катышуучуларын жана анда каза болгондордун жакындарын да кубандырып жаткан чагы. Анткени буга чейин баатырлардын атынан бир да жерге расмий наам ыйгарылган эмес.
"Апрель окуясына быйыл жети жыл болоюн деп калды. Буга чейин бир дагы жерге Апрель баатырларынын ысмы ыйгарылган эмес. Жок дегенде жети жылдыкка карата чокуга наам берилиши жакшы көрүнүш болду. Мындан сырткары, Шабдан баатыр көчөсүнүн Чүй проспектисинен Кой-Таш айылына чейинки бөлүгүнө Апрель баатырларынын атын ыйгаруу сунушталып келе жатат. Буюрса бул иш дагы жакынкы аралыкта ишке ашып калат деген ойдобуз", — деди апрель окуясынын катышуучусу, "Апрель байрактары" коомунун теңтөрагасы Сүйүнбек Оморов.
Каргашалуу күнү ок жеп каза болгон 21 жаштагы Адилет Айнидиновдун атасы Сыртбай Айнидинов мамлекет тарабынан аларга жакшы жардамдар болуп жатканын жашырбай, чокуга аталыш ыйгарылып жатканын жакшы саамалык деп атады.
Ак-Суу районунун Челпек айыл өкмөтүнүн башчысы Эрлан Жыргаловдун айтымында, бул идея алты жыл мурда эле сунушталган.
"Демилге 2011-жылы көтөрүлгөн. Бирок сөз бойдон калып калган. Кийин элден кайрадан сунуш түшүп, жергиликтүү кеңештин депутаттары аны колдошту. Карап көрсөк өлкөнүн бир да жерине Апрель баатырларынын аты коюлбаптыр", — деди Жыргалов.
Маалыматка ылайык, Апрель окуясынын катышуучуларына жана окуядан каза болгондорго "баатыр" деген атайын статус берилбейт. Болгону алардын аты көчөлөргө, мекемелерге коюлат.
Апрель баатырларынын наамы ыйгарылган чоку Ысык-Көл облусундагы Тескей Ала-Тоо кыркасында жайгашып, бийиктиги 4142,2 метрди түзөт.
