БИШКЕК, 20-мар. — Sputnik. Борбор калаада "Балдар филармониясы" музыкалык-билим берүү программасынын алкагында "Үндүн сыйкыры" бет ачар концерти өтөт. Бул туурасында "Роза Отунбаеванын демилгеси" эл аралык коомдук фондусунан кабарлашты.
Фонду кыргызстандык балдарды мыкты аткаруучулар менен бирге музыка дүйнөсүнө саякат жасоого чакырган.
"Концерттин программасы силерди үндүн боёктору менен тааныштырат: эркектин үнү — тенор, баритон, бас; айымдардыкы — колоратурдук сопрано, сопрано жана альт. Силер бир нече сонун жана белгилүү ырларды жана мыкты опералардан чакан номерлерди уга аласыңар", — деп айтылат фондунун балдарга кайрылуусунда.
Уюштуруучулар эң баамчыл жана ышкыбоз жаш угарманга "Манас сүрөттөрдө" китеби байге катары берилерин кошумчалашты.
Музыка майрамы бул жылдын 23-мартында Улуттук филармониянын чоң залында өтөт.
