БИШКЕК, 16-мар. — Sputnik. Самарадан келген сүрөтчү Арсений Сычов Бишкекти башкача ракурстан тартып, анын ажайып кооздугун өзүнүн Instagram баракчасына жарыялаган.
Ал бардык сүрөттөрүн телефонго тарткан.
Саякат кылуу менен ал архитекторлор тууралуу да маалыматтарды чогултат. Ал өз суроосуна социалдык тармактын колдонуучуларынан жооп аларын айтат.
"Бишкек шаарындагы 18-кабаттуу алгачкы имарат 1992-жылы пайдаланууга берилген. Кимдир бирөөлөр көп кабаттуу үйлөрдөн коркушкан. Бирок ал жакта жашагандар мындай тынчсыздануу бекер экенин айтышат. Биздин үйдү немис салып, ал 18-кабатта жашап, анын сапаттуу салынганын тастыктагысы келген", — деп колдонуучулардын бири жазган.
Сычов Бишкекте бир айдай жүргөн. Учурда ал Казакстанды кыдырууда.
