БИШКЕК, 15-мар. — Sputnik. Эл аралык "Манас" аэропортуна жакын жердеги Дача айылына кулаган учактан жабыркагандарга жардам берүү үчүн ачылган ӨКМдин атайын эсеби бүгүн жабылды. Бул тууралуу Өзгөчө кырдаалдар министрлиги кабарлады.
Эске салсак, 16-январда Дача айылына кулаган учактан 39 киши каза болгон.
Билдирүүгө ылайык, 14-март күнү кечки саат 17:00гө чейин атайын эсепке 96 миллион 532 миң 26 сом 61 тыйын чогулган.
"Акча каражаты атайын түзүлгөн өкмөттүк комиссияга өткөрүп берилет. Акча бөлүштүрүү ачык-айкын болушу үчүн комиссиянын түзүмүнө жабыркагандар дагы кирет", — деп жазылат маалыматта.
39 адамдын өмүрүн алган учак кырсыгынан жапа чеккендер үчүн каражат чогултуу кырсыктын эртеси, 17-январда башталган.
