Свердлов районунда алты медресе текшерилип, жыйынтыгында анын бешөө уруксат жок, начар шартта иштеп жатканы белгилүү болду. Бул тууралуу мэриянын маалымат катчысы Гуля Алмамбетова кабарлады.
Анын айтымында, тийиштүү органдар тарабынан жүргүзүлгөн рейдде аталган райондо жайгашкан беш диний окуу жайынын шарты начар экени аныкталган.
"Текшерүүнүн жүрүшүндө Бишкек шаарынын аймагында жайгашкан "Биринчи Кадам", "Абубакир Сыдык", "Муртазали", "Ыйык биримдик" жана "Мускан Торо" медреселери каттоосу жок иштеп жатканы маалым болду. Бул медреселерде балдар эч кандай китеп, дептер, калемсап жок эле окуп жатканын көрдүк. Биринде да гигиеналык норма сакталган эмес, ошондой эле Дин иштери боюнча комиссия менен Мусулмандар дин башкармалыгынан каттоодон өтүшпөптүр",— деди Алмамбетова.
Мындан улам аталган мекемелер тиешелүү документтерин даярдаганча анын ишмердүүлүгүн токтотуу боюнча каттар тиешелүү жактарга жиберилди.
