БИШКЕК, 26-фев. — Sputnik. Өмүрбек Текебаевди камакка алуу аны сындыруу аракети экенин "Ата Мекен" фракциясынын депутаттары УКМКнын алдындагы акцияда журналисттерге билдирди.
Белгилей кетсек, "Ата Мекен" фракциясынын лидери Өмүрбек Текебаев бүгүн таңда УКМК тарабынан 48 саатка камакка алынды.
"Өмүрбек Текебаевди аэропорттон кармап кетүү аны сындыруу аракети деп баалайм. Ал киши өлкөдөгү декмократиянын орношуна чоң салым кошкон", — деди Садык Шер-Нияз.
"Ата Мекен" фракциясынын дагы бир депутаты Алмамбет Шыкмаматов кылмыш иши негизсиз козголгондугун билдирди.
"Бийлик Маевский менен атайын сүйлөшүп алган. Бирөө акча алды десе эле камай берген болбойт да. Эч кандай далилдери жок туруп камашты. Бул саясий куугунтук", — деди Шыкмаматов.
Ал эми депутат Каныбек Иманалиев нааразычылык акциясы мөөнөтсүз уланаарын айтып, учурда пратиянын штабында 20га чукул адам иштеп жаткандыгын кошумчалады.
Аида Салянова болсо бир дагы кадам артка жылуу болбой тургандыгын баса белгиледи.
Бишкек ШИИБ тараткан маалыматка ылайык, акцияга 80ге чукул адам чыккан.
Анткен менен видеодон митингге чыккандардын саны көп экенин көрүүгө болот.
Эске салсак, депутатка карата кылмыш иши Башкы прокуратура тарабынан козголуп, тергөө иштерин УКМК жүргүзүп жатат.
Бүгүн Базар-Коргон районунда Текебаевдин тарапташтары митингге чыгып, аны бошотууну талап кылуу менен тарап кетишсе, Оштогулар каршылык акциясына чогула баштады.
