БИШКЕК, 23-фев. — Sputnik. Бишкекте 28-февралда "TechWomen" делегациясы менен ачык жыйын өткөрүлөт. Анда дүйнөдөгү ири IT-компанияларды түзө алган аялдар катышат. Бул тууралуу иш-чаранын уюштуруучулары кабарлады.
Жолугушуу Кыргызстандагы IT-форум менен информация-коммуникациялык технологиялар жумалыгына карата өткөнү жатат. Делегациянын курамында 16 адам бар. Ага илим, технология, инженерия жана математика боюнча адистер кирет. Ошондой эле ири компаниянын өкүлдөрү дагы келишет:
- Нандини Рамани, Twitter компаниясынын вице-президенти;
- Лидия Швец, NASA изилдөө борборунун программалык директору;
- Рима Акрас, LinkedIn компаниясынын техникалык кызматкери;
- Деванши Шет, Symantec компаниясынын башкы программалык менеджери;
- Кико Смит, чукул тапшырмалар боюнча ага инженер.
Жолугушууга Кыргызстандагы IT-компаниялардын өкүлдөрү, Жогорку технологиялар паркынын резиденттери, мамлекеттик органдар, мамлекеттик эмес секторлор менен окуу жайлардын студенттери катышат. Башка каалоочулар алдын ала каттоодон өтүп бекер кирсе болот.
