БИШКЕК, 23-фев. — Sputnik. Кыргызстандын курама командасы Австрияда өтө турган VII дүйнөлүк атайын кышкы олимпиада оюндарына катышат. Бул тууралуу Жаштар иши, дене тарбия жана спорт агенттиги кабарлады.
Эл аралык спорттук иш-чаранын максаты Психикалык жактан жабыркаган адамдарды коомчулукка көндүрүү, аралаштыруу болуп эсептелет. Олимпиада 14-марттан 24-мартка чейин Австриянын Грац жана Шладминг шаарларында өткөрүлмөкчү.
Мелдешке 8 жаштан 22 жашка чейинки спортчулар катышып, кышкы спорттун сегиз түрү боюнча ат салышат.
Кыргызстандын курама командасынын ичинде үч спортчу жана эки машыктыруучу бар. Олимпиадага катышууга дирекциянын бюджетинен 338 миң сом акча бөлүнгөн.
