Екатеринбургдагы мигранттар депортация чечимине каршылык көрсөтүштү

БИШКЕК, 23-фев. — Sputnik. Свердлов облусунун прокуратурасы Екатеринбургда жайгашкан чет элдик жарандарды убактылуу кармоочу борборундагы мигранттардын эрежеге баш ийбөө фактысын карап жатат. Бул тууралуу РИА Новости прокурордун ЖМК менен байланышуу багытындагы жардамчысы Марина Канатовага шилтеме берүү менен жазып чыкты. 

Анын айтымына караганда, учурда Екатеринбургдун прокурорунун орун басары менен шаардын Октябрь райондук прокурорунун орун басары жеринде иш алып барып жатат.

"Факт боюнча текшерүү иштери жүргүзүлдү. Алдын ала маалыматтарга караганда, 6.50 чамасында (Бишкек убактысы боюнча 7.50) саат 10.00дө депортациялана турган жарандардын бири бөлмөсүнүн эшигин ачпай отуруп алган", — деп билдирди Канатова.

Ал кошумчалагандай, алдын ала маалыматтар боюнча аталган мигрант менен кошо бөлмөдө дагы тогуз адам бар.

Свердлов облусунун ИИМинин маалымат кызматынын жетекчиси Валерий Горелых учурда полиция кызматкерлери мигранттарга Россиянын мыйзамдары жөнүндө түшүндүрмө берип жатканын белгиледи. Анын айтымында, бөлмөдө өзбекстандык, тажикстандык, казакстандык жети мигрант бар. Алар Россияда иштегилери келе турганын айтып өлкөдөн чыгарбоону суранышкан. Горелых бул жарандардын бардыгы буга чейин Россиянын Кылмыш жаза кодексинин ар кандай беренелери боюнча соттолушканын кошумчалаган.

Учурда бул боюнча түшүндүрүү иштери жүргүзүлүп жатат.