Абулгазиев: айыл чарбасын кайра иштетүү ишканаларына 6 пайыздык насыя берилет
Айыл чарбасын кайра иштетүү ишканаларына алты пайыздык насыя берилет. Бул тууралуу өлкөнүн биринчи вице-премьери Мухамметкалый Абулгазиев парламентте жазгы талаа иштерине даярдык тууралуу маалымат берип жатканда билдирди.
"Жеңилдетилген насыяга 700 миллион сом бөлүнгөн. Ошонун 321 миллиону айыл чарбаны камсыздоо боюнча беш долбооруна кетет. Ал эми 378 миллиондон ашыгыраагы айыл чарбаны колдоо боюнча төртүнчү долбооруна жумшалат. Ошол 321 миллион сом алты пайыздан экспортко багытталган айыл чарбасын кайра иштетүү ишканаларына, калганын 10 пайыздык үстөк менен өсүмдүк жана мал чарбасына берилет", — деди Абулгазиев.
Вице-премьер жеңилдетилген насыянын мөөнөтү 36 ай болорун кошумчалады.
