БИШКЕК, 10-фев. — Sputnik. КРдин Башкы прокуратурасы социалдык тармактардагы "өлүм топторун" жаап салууга уруксат алганын көзөмөл органдын маалымат кызматынан билдиришти.
Буга чейин Башкы прокуратура айрым сайттарда жарыяланган маалыматтарды таратууга тыюу салынышын таанып берүү арызын Бишкек шаарынын Октябрь райондук сотуна жолдогон. Прокурорлор бул демилгесин өспүрүмдөрдү социалдык тармактардагы терс таасирин тийгизген маалыматтардан оолак кармоо максаты менен байланыштырышкан. Бүгүн сот аталган арызды канааттандырды.
Маалыматка караганда, эми социалдык тармактарда "өмүм топторуна" байланыштуу билдирүүлөр расмий түрдө мыйзамсыз болуп эсептелет.
"Соттун чечимин өлкө ичинде жана анын сыртында ишке ашыруу милдети Мамлекеттик маалыматтык технологиялар жана байланыш комитетине жүктөлдү", — деп айтылат билдирүүдө.
Ошондой эле Башкы прокуратуранын жашы жете электердин маалыматтык коопсуздугун жана укуктарын коргоо боюнча иштери мындан ары да улантылаары кошумчаланды.
