БИШКЕК, 10-фев. — Sputnik. Башкы прокуратура Максим Бакиевдин ишенимдүү адамына тиешелүү камакта турган мүлктү (Скрябин көчөсү 45-45а дарегиндеги имарат) өткөрүп берүү фактысы боюнча кылмыш ишин козгоду. Мурдараак Башкы прокуратура аталган учаcток боюнча чечими үчүн Мамлекеттик каттоо кызматынын төрагасы Тайырбек Сарпашевди кызматынан бошотуу боюнча сунуш катын премьер-министр Сооронбай Жээнбековго жолдогон.
Башкы прокуратурадан билдиришкендей, Сарпашевди кызматынан четтетүү сунушу анын райондор аралык соттун аталган кыймылсыз мүлктү камактан чыгаруу чечимин аткарууга тапшырма бериши себеп болгон. Тапшырма берилген маалда райондор аралык соттун чечими Бишкек шаардык сотунун чечими менен токтотулган. Сарпашев ал жетектеген ведомство соттун чечимин гана аткаргандыгын айтып, муну алдыдагы президенттик шайлоого таасир эткиси келген ададмардын аракети катары баалоодо.
Башкы прокуратуранын маалыматына караганда, прокуратура органдарынын 2010-жылдын 7-майындагы жана 2012-жылдын 11-октябрындагы токтому менен Максим Бакиевдин жакын адамы болуп эсептелген Ульяна Пакка тиешелүү "ЭлитДомСтрой" ЖЧКсынын мүлктөрү жана Скрябин көчөсүндөгү кыймылсыз мүлктөрү камакка алынган.
