БИШКЕК, 9-фев. — Sputnik. Башкы прокуратура премьер-министр Сооронбай Жээнбековдун атына Мамлекеттик каттоо кызматынын жетекчиси Тайырбек Сарпашевди кызматынан четтетүү боюнча сунуш киргизди. Бул тууралуу аталган мекеме кабарлады.
Маалыматка ылайык, мындай кадамга Сарпашевдин өткөн жылдын 30-ноябрында Максим Бакиевдин ишенимдүү адамы Ульяна Пакка тиешелүү кыймылсыз мүлктү камактан чыгаруу боюнча Бишкектин район аралык сотунун чечимин аткаруу буйругу себеп болгон.
"Каттоо кызматы аталган маселе кассациялык кароого жиберүү боюнча расмий маалымдар болгон. Мындан тышкары, ошол маалда район аралык соттун чечимин ишке ашыруу шаардык сот тарабынан токтотулган", — деп айтылат билдирүүдө.
Прокуратура Сарпашевге Максим Бакиевдин жана анын жакындарынын мүлкүн конфискациялоо боюнча маселе элдин көңүл чордонунда экенин билип туруп, Бишкек мамлекеттик каттоого түз буйрук бергенин кине коюуда. Мекеменин айтымында, Сарпашев "Коррупцияга каршы туруу" мыйзамын бузган.
