БИШКЕК, 9-фев. — Sputnik. Кыргызстандын президенти Алмазбек Атамбаев Европа биримдигинин (ЕБ) Брюсселдеги башкы кеңсесине 16-февралда иш сапары менен келет. Бул тууралуу РИА Новости ЕБдин Кыргызстандагы элчиси Чезаре де Монтиске шилтеме берүү менен жазып чыкты.
Иш сапардын алкагында Атамбаев Европа биримдигинин институттарынын жетекчилери менен жолугушары белгиленген.
"Алмазбек Атамбаев ЕБдин Брюсселдеги кеңсесине 16-февралда келет. Иш сапардын алкагында Кыргызстан менен ЕБдин ортосундагы жаңы келишим боюнча кызматташуу маселелери талкууланат", — деп билдирген Монтис.
Ал белгилегендей, жаңы келишим боюнча талкуу учурунда экономикалык кызматташууга басым жасалат.
"Атамбаев президенттик кызмат учурунда Брюсселге ушуну менен үчүнчү ирет келгени жатат. Анын 2013 жана 2015-жылдары жасаган иш сапары Кыргызстан менен ЕБдин мамилелерин чыңдоого чоң салым кошкон", — деп белгилеген Монтис.
Элчи Европа биримдиги Кыргызстандагы демократиялык реформаларды колдоого ар дайым даяр экенин айтып, Атамбаевдин сапарынан кийин Европарламенттин 10 депутатынан турган делегация Кыргызстанга келиши ыктымал экенин кошумчалаган.
