БИШКЕК, 8-фев. — Sputnik. Борбор калаадагы Манас проспектисинин ортосун бойлой темир тосмолор орнотула турганын "Бишкекасфальтсервис" ишканасынан кабарлашты.
Маалыматка караганда, муниципалдык ишкана металлдан жасалган тосмолорду орнотуу үчүн даярдык иштерин көрүп жатат.
Учурда жолдун айрым жерлериндеги бордюрлар чыгарылууда. Жакынкы аралыкта ишкана 90го жакын темир- бетондон жасалган тосмолорду орното баштайт.
"Мындай иштер айдоочулардын коопсуздугун сактоого багытталган. Бордюрлардын бийиктиги болгону 30 сантиметр ал эми парапеттин бийиктиги бир, узундугу үч метрге жетет. Мындай тосмолор Аламүдүн базарынын аймагына орнотулуп, эффективдүүлүгүн көрсөтүүдө", — деп айтылат маалыматта.
"Бишкекасфальтсервис" ишканасынан мындай тосмолорду орнотуу менен жол кырсыктарын алдын алууга болорун айтышты.
