БИШКЕК, 8-фев. — Sputnik. АКШнын Ички иштер коопсуздук министрлиги өлкөгө кирген чет элдик жарандардын социалдык тармактагы аккаунттарынын паролдорун сурап башташы мүмкүн экенин РИА Новости АКШнын коопсуздук министри Жон Келлиге шилтеме берүү менен жазып чыкты.
Келли өлкөгө кире турган жарандарды текшерүү күчөтүлөрүн билдирген.
"Биздин өлкөгө кирип жаткан жарандардын паспортун текшерүү менен чектелбестен, алардын социалдык тармактардагы паролдорун кошо сурашыбыз ыктымал. Биз алардын интернетте эмне менен алектенерин билишибиз керек. Эгер жарандар маалыматтарын берүүдөн баш тартса, өлкөгө киргизилбейт", — деди Келли.
Ал ошондой эле мындай кадам азыр эле ишке ашып кетпей турганын белгилеген.
