БИШКЕК, 1-фев. — Sputnik. Бишкектик ата-энелер "Тихий дом" деген жүрөк үшүн алган интернет оюн Бишкекке да жетти деп айгай салып жатышат. Шаардыктар эки өспүрүмдүн өз өмүрүнө кол салуусуна ушул оюндардын тиешеси бар деп болжошууда.
Sputnik россиялык колдонуучулардын кеңештери менен таанышып, психолог Лейла Сыдыгалиева жана IT-адис Михаил Дудин менен балдарды кантип коопсуздандыруу керектиги тууралуу баарлаштык.
- Канткен күндө да өспүрүмдүн жашоосун толук көзөмөлдөй алууга мүмкүн эмес. Эгер балага басым жасап, интернетте отурууга тыюу салсаңыз ал түнт болуп калат. Буга чейин жасап келген иштерин сизге көрсөтпөй уланта берет.
- Жумушуңуз ал-күчүңүздү алса дагы балдарга убакыт бөлгөнгө аракет жасаңыз. Алардын пикирин качан болсо уга турганыңызды көрсөтүшүңүз керек. Сизге дос катары мамиле жасашына шарт түзүңүз.
- Өлүмгө болгон кызыгуу өткөөл куракта күч аларын унутпаңыз. Бул абдан кооптуу мезгилдердин бири.
Алгач өспүрүм менен достошуп, аны менен бир толкунда болгондон кийин гана өзүңүздүн пикириңизди айтып баштасаңыз болот. Эгер жемелей турган болсоңуз, ар бир айткан сөзүңүз текке кетет.
Эгер балаңыз сизге социалдык тармактагы баракчасын көрсөтпөй жатса ага акырын кайрылып, эмнеге минтип жатканын сураңыз.
Өспүрүм социалдык тармактагы баракчасына басмырланган, денесин кескилеген сүрөттөрдү кое баштаса, демек, чочулоого негиз бар.
Эгер балаңыздын интернет баракчасында мышыктын, көпөлөктүн, мүйүздүү жылкынын, киттин же медузанын сүрөттөрү пайда боло баштаса — бул жаман белги.
Айрым маалыматтарга караганда, белгисиз адамдар эгер балдар суицид жасабаса IP-дареги аркылуу таап алып, жакындарынын баарын өлтүрө турганын айтып коркутат. Эсиңизде болсун: IP адамдын өздүгү тууралуу эч кандай маалымат бере албайт!
Өспүрүм тууралуу көбүрөөк маалыматты анын жеке баракчаларын барактап отуруп таап алса болот. Ал жакта баланын кайда окуп, жашай турганы, ата-энеси кайда иштери тууралуу нерселер жазылган. Бул мааламыттарды жаман ойлуу адам өз кызыкчылыгы үчүн пайдаланышы толук мүмкүн, андыктар алардын баарын өчүрүп салуу туура болот.
