БИШКЕК, 26-янв. — Sputnik. Президент Алмазбек Атамбаев Дача айылындагы кырсыктан жабыркагандардын абалы менен таанышат. Бул тууралуу Жогорку Кеңештин спикери Чыныбай Турсунбеков парламентте айтты.
Анын айтымында, өлкө башчы Атамбаев бүгүн саат 11де кырсыктан жабыркагандар менен жолугуп, ал-абалын сурайт. Президентти министрлер коштоп жүрөт.
Бул маалыматты президенттин аппаратынан тастыктап, Атамбаев Дача айылындагы авиакырсыктан каза болгон жарандардын туугандары менен жолугарын кошумчалашты.
"Бүгүн саат 11:00до мамлекеттик "Ала-Арча" резиденциясында президент Алмазбек Атамбаев авиакырсыктан каза болгон жарандардын туугандары менен жолугат", — деп билдиришти президенттин аппаратынан.
Эске салсак, 16-январда Boeing-747 учагы "Манас" эл аралык аба майданынын жанындагы Дача айылына кулап, анын кесепетинен 39 киши каза болгон, алардын төртөө экипаж мүчөлөрү эле.
