Дача айылында авиакырсыктан жабыркаган элдин ден-соолугун текшерип, аларга медициналык кызмат көрсөтүү максатында мобилдик клиника иштеп жатат.
Аталган мобилдик клиникада элге медициналык жардам көрсөтүп жаткан балдар дарыгери Бурул Рысалиеванын айтымында, көбүнчө балдар кырсыктан кийин катуу коркуп калышкан.
"Жүзгө чукул адам келсе, алардын теңинен көбү балдар. Баары катуу коркуп калышкан. Арасында уктай албай жатабыз, көзүбүзгө көрүнүп жатат дегендери болсо, айрымдары колубуз калтырап тамак иче албай калдык деп келишүүдө. Кан басымы түшүп же жогорулап кеткен улуу муундагы адамдар да кайрылып жатат. Айыл жашоочулары муктаж болгон дары-дармектин баары бекер берилүүдө. Ошондой эле жеңил күйүктөр, буту-колун оорутуп алгандар да бизге келип жатышат", — деди Рысалиева.
Мобилдик клиниканын ичинде ЭКГ, УЗИ аппараттары иштеп, жүрөгү же башка органдары ооруп кайрылгандарды дароо тартып, аларга дарыгерлер тарабынан тийиштүү дары-дармек жазылып берилүүдө.
