БИШКЕК, 15-янв. — Sputnik. АКШнын Түштүк Каролинасында 18 жыл мурда төрөт үйүнөн уурдалып кеткен кыз табылганын Daily Mail сайтына шилтеме берип РИА Новости жазып чыкты.
Маалыматка караганда, Камия Мобли 18 жылдан бери өзүн уурдап кеткен аял менен жашап, аны өз апам деп эсептеген.
Учурда 51 жаштагы Глория Уильямс кызга документтерди жасатып алган. Бирок анда кыздын туулган күн, ай, жылы ошол бойдон калган.
Дал ушул маалымат полиция кызматкерлеринде шек жаратып, аны текшерип көрүүнү чечишкен. Качан гана ДНК-анализи чыккандан кийин Уильямс адам уурдоо беренеси менен айыпталды.
Камия азырынча өзүнүн чыныгы үй-бүлөсүнө кайтууга көңүлдөнө элек. Анүстүнө Америка мыйзамдарына ылайык кыз менен чыныгы үй-бүлөсү "кошулушу" эки тараптын макулдугу менен гана ишке ашат.
АКШнын айрым штаттарындагыдай эле Түштүк Каралинада дагы бойго жетүү курагы 18 жаш деп эсептелет.
