БИШКЕК, 15-янв. — Sputnik. Америкалык жаран Сан-Франциско шаарындагы китепканага 100 жыл мурда алынган китепти кайрып бергендигин San Francisco Chronicle гезитине шилтеме берип РИА Новости жазып чыкты.
Фрэнсис Хопкинс Смиттин "40 мүнөт кийинчерээк" аңгемелер жыйнагын Уэбб Джонсондун чоң энеси китепканадан 1917-жылы алган.
Уэбб китепти үйүнөн 1996-жылы таап алып, ушунча жылдан бери китеп үй-бүлөнүн менчигине өтүп кеткендир деген ой менен китепканага жеткирип берген эмес.
Китепкана кызматкерлерине китепти берип жатып, Уэбб 20 жылдан ашык китепти атайылап алып келбей жүргөндүгү үчүн өкүнөрүн билдирди.
Бирок китепкана кызматкерлери убагында берилбей калган китептерди кайтарып алуу максатында атайын акция жүргүзүп жаткандыктан бир кылымга кечиктирилген китеп үчүн айып пул алынган эмес.
Эскерте кетсек, өткөн жылдын декабрь айында британиялык пенсионер аял өзү аяктаган мектептин китепканасына 63 жыл мурда алган китебин жеткирип берген.
