БИШКЕК, 10-янв. — Sputnik. Индиянын Кыргызстандагы элчилиги өкмөттүн Ош облусундагы өкүлчүлүгүнө "Махабхарата" эпосунун кыргызча котормосун белекке берди. Бул тууралуу Sputnik Кыргызстан агенттигине аймактык кабарчы билдирди.
Белгилей кетсек, Ош облустук китепканада Индия маданиятынын бурчу ачылып, ал жакка 500гө чукул китеп коюлду. Аталган иш-чара Кыргызстан менен Индиянын кызматташтыгын арттыруу максатында ачылып, ага дипломат Кумар Ракеш Свами баштаган атка минерлер катышты.
"Эки өлкөнүн кызматташуусу бул жакшы көрүнүш. Биз бир гана адабият жаатында эмес, архитектура, тарых жана йога боюнча китептерди алып келдик. Буга чейин Индия маданиятынын борборлору Талас жана Караколдо ачылган", — деди Свами.
Ал жакынкы күндөрү Жалал-Абад менен Кызыл-Кыяда дагы Индия маданиятын чагылдырган борборлор ачыларын кошумчалады.
"Алтын Тадж" Кыргызстан жана Индия достугу" коомдук фондусунун директору Миррахим Токтогулов эки өлкөнүн достугун арттыруу боюнча иш-чаралар улантыларын билдирди.
"Жакынкы күндөрү Ош шаарында Индия борборун ачуу пландалууда. Ал жерде бир гана маданий иш-чаралар эмес, йога боюнча да секциялар болот", — деди Токтогулов.
"Махабхарата" — дүйнөгө атагы чыккан эпос. Анын "Бхагавад-Гита" бөлүгү атактуу жазуучуларды таасирленткен.
