БИШКЕК, 12-янв. — Sputnik. Нарын облусундагы Ат-Башы районунун мектеп окуучуларына каникул учурунда ачык эшик күнү өткөрүлдү. Бул тууралуу өкмөттүн Нарын облусундагы ыйгарым укуктуу өкүлүнүн маалымат катчысы Айнура Дүйшөк кызы билдирди.
Анын айтымында, мектеп окуучулары өкмөттүн Нарын облусундагы ыйгарым укуктуу өкүлүнүн аппаратында болуп, мамлекеттик кызматкерлердин иш орду менен таанышты.
"Өкмөттүн Нарын облусундагы ыйгарым укуктуу өкүлдүн иш бөлмөсү менен таанышуу учурунда 20 баланын ичинен беш окуучу облус башчысынын ордуна отуруп, жетекчи катары сөз сүйлөп, тилектерин ишке ашырышты", — деди Дүйшөк кызы.
9 Үчтүн айы 2017, 14:37
Окуучулар имараттын ар бир кабатындагы иш бөлмөдө болуп, кызматкерлер менен пикир алышкан. Ал эми өкмөттүн Нарын облусундагы ыйгарым укуктуу өкүлүнүн орун басары Жаркын Ибраева менен аппарат жетекчи Жаныбек Дүйшеев балдардын суроолоруна жооп берип, алардын окууларына ийгилик каалоо менен бирге белектерди тапшырышкан.
Иш-чара 5-11-класстарда окуп жаткан жетим балдар үчүн Ат-Башы райондук ички иштер башкармалыгы тарабынан уюштурулган.
