"Эсимде" телесынагынын жеңүүчүлөрү аныкталды

БИШКЕК, 27-дек. — Sputnik. Токтогул Сатылганов атындагы кыргыз улуттук филармонияда "Эсимде" аталышындагы телесынагын жыйынтыктаган гала концерт уюштурулду. Бул тууралуу Маданият, маалымат жана туризм министрлиги билдирди.

Конкурс эки тур менен өтүп, ага 400дөй эмгек түшкөн. Өнөрпоздордун чыгармачылыгын СССРдин Эл артисти Кайыргүл Сартбаева, КРдин Эл артисти Анарбек Ибраев, КРдин эмгек сиңирген ишмерлери Кыялбек Урманбетов менен Рафаэль Сарлыков баалашты.

Эстрада жанры боюнча Гүлүм Касымбаева ("Эсимде"), Мыктыбек Нурланбеков ("Сагынам"), Айсана Усупбаева ("Созулма") алдыңкы орунду ээлесе, опера жанры боюнча Бактыбек Алмабеков ("Жалынга күйгөмүн"), Сыргак Асанакунов ("Түндө"), Нурбек Кимболотов ("Эне жөнүндө баллада") калыстардын купулуна толду. Ал эми фольклор жанры боюнча Акыл Серкебаев ("Насыйкат"), Нурзат Ажыкожоева ("Мунарым"), Калыбек Турганов ("Ой, булбул") мыкты болушту.

Аранжировка жаатында Айганыш Текенова, Асылбек Насирдинов, Азамат Такырбашев жана Наргиза Курмановалар өзгөчөлөнүштү.

Сынактын жалпы байге фонду 1,5 миллион сомду түзүп, алдыңкы орунду алгандар акчалай байгелер менен сыйланды. Сыйлык тапшыруу аземине Маданият, маалымат жана туризм министри Түгөлбай Казаков баштаган эл артисттери катышты.