БИШКЕК, 16-дек. — Sputnik. АКШнын президенти Барак Обама шайлоонун жүрүшүнө "кийлигишикени" үчүн Вашингтон Россияга карата чара көрөрүн билдиргенин РИА Новости маалымдады.
Эске салсак, 8-ноябрда АКШда президенттик шайлоо өтүп, анда республикачыл Дональд Трамп жеңишке жеткен болчу.
"Башка мамлекет биздеги шайлоонун ачыктыгына таасир берип жатса, биз кандай болгон күндө дагы ага чара көрүшүбүз керек", — деп Обама NPR радиосуна берген маегинде баса белгилеген.
"Алардын айрымдары ачыкка чыкса, айрымдары ачыкка чыгарылбайт. Бул маселе боюнча Путиндин жакшы эле маалыматы бар. Анткени ал менен бул темада ачык эле сүйлөшкөнбүз", — деди Обама.
Октябрь айында АКШнын атайын чалгындоо кызматы шайлоо системаларына Россиянын хакерлери чабуул жасаганын айтып чыгышкан. Мындан сырткары, АКШлык тыңчылар Москваны демократтардын серверлерин бузуп, Трапмка жардам берген деп айыптоодо. Ал эми Россия бардык кинелерди четке кагып келет.
