БИШКЕК, 5-дек. — Sputnik. Пакистанда мейманкана өрттөнүп 11 киши каза болуп, 30дай адам жаракат алды. Бул туурасында Dawn гезитине таянып РИА Новости билдирди.
Басылманын билдирүүсүнө караганда, окуя жекшемби күнү Карачи шаарында Regent Plaza мейманканасында катталган. Өрт мейманкананын биринчи кабатында жайгашкан ашканасында башталып, жетинчи кабатка чейин көтөрүлгөн. Кырсыктан сактануу үчүн ал жакта жаткандар терезелерден секирип чыгышкан.
Куткаруу кызматынын башчысы Сеемина Джамалинин айтымында, тилсиз жоонун кесепетинен медициналык жардамга сөөгү сынган, денеси айрылган жана түтүнгө ууккан 65тен ашуун адам кайрылган. Жабыр тарткандардын арасында үч чет өлкөлүк жаран бар болуп чыкты.
Кырсык болгон жерге келген өрт өчүрүүчүлөр үч сааттан кийин гана өрттү өчүрүшкөн. Мейманканада эл калып калышы мүмкүн делгендиктен учурда куткаруу операциясы уланууда. Өрттүн келип чыгуу себеби азырынча тактала элек.
