БИШКЕК, 2-сен. — Sputnik. Пакистандын түндүк-чыгыш аймагында соттун имараты жарылып, кеминде 12 киши набыт болду. Бул туурасында РИА Новости Рейтер агенттигине шилтеме кылып билдирди.
"Каза болгон 12 кишинин сөөгүн таптык, алардын арасында жактоочулар, полиция кызматкерлери жана жай жарандар бар", — деп билдирди куткаруу кызматынын өкүлү Харис Хабиб.
Geo TV телеканалынын маалыматына караганда, жума күнү эртең менен Мардан шаарындагы аймактык сотто эки ирет теракт жасалган. Бир жан кечти өзүн жардырып жиберген, экинчиси соттун имаратынын ичине кирем деп аракет кылып жатканда жарылып кеткен.
Телеканал аскерлер теракт болгон жерди курчоого алып, учурда трагедияны уюштургандар изделип жаткандыгын билдирди.
