БИШКЕК, 4-дек. — Sputnik. Өзбекстандын Бишкектеги элчилигинде президенттик шайлоого добуш берүү жүрүп жатканын аталган элчиликтен билдиришти.
Эске салсак, бүгүн, 4-декабрда Өзбекстанда президенттик шайлоо өтүп жатат. Ага төрт саясий партия төрт талапкерди көрсөткөн.
"4-декабрда саат 6:00дө элчиликтин алдындагы №8 шайлоо участогу ачылды. Биринчилерден болуп элчиликтин кызматкерлери менен алардын үй-бүлө мүчөлөрү добуш беришти. Добуш берүү жергиликтүү убакыт боюнча саат 20:00гө чейин жүрөт", — деп айтылат маалыматта.
Өзбекстандын борбордук шайлоо комиссиясынын маалыматы боюнча шайлоочулардын тизмесинде 21 миллион киши бар. Эгер шайлоочулардын 33 пайызынан азы катышса шайлоо өттү деп эсептелбейт. Борбордук шайлоо комиссиясы шайлоонун расмий жыйынтыгын мыйзам боюнча он күндүн ичинде чыгарат.
Өзбекстандагы президенттик шайлоого Нуржан Шайлдабекова башында турган Кыргызстандын делегациясы да көз салууда.
Президенттик шайлоого катышып жаткан партиялар:
Эске сала кетсек, буга чейинки президент Ислам Каримов 78 жашында көз жумуп, такты бош калган. Ал эми өлкө башчылыктын милдетин убактылуу Шавкат Мирзиёевге жүктөлгөн. Өзбекстандын Борбордук шайлоо комиссиясынын маалыматы боюнча, өлкөдө 9381 участка даярдалган. Мындан сырткары, башка мамлекеттерде 44 шайлоо участкасы ачылган. Добуш берүү жергиликтүү саат 6:00дөн 20:00гө чейин болот. Саясат таануучулардын божомолунда өлкө башчылыкка Өзбекстандын либерал-демократиялык партиясынан көрсөтүлгөн Шавкат Мирзиеевдин мүмкүнчүлүгү жогорураак болуп турат.
