БИШКЕК, 25-ноя. — Sputnik. Спирт ичимдиктерин сатып байыган испаниялык миллиардер Антонино Фернандес 210 миллион долларын туулуп өскөн айылынын тургундарына мурас кылып жазып кеткен. Бул тууралуу The Telegraph басылмасы билдирди.
Маалыматка ылайык, белгилүү Corona сыра брендинин жаратуучусу Антонино Фернандес ушул жылдын август айында 98 жаш курагында каза болуп, байлыгынын бир бөлүгүн Испаниянын түндүгүндөгү Сересалес дель Кондадо айылындагы айылдаштарына калтырып кеткен. Миллиардер бул айылда 1917-жылы туулуп 13 бир туугандын 11-си болчу. 14 жашында Фернандес мектепти таштап жакыр үй-бүлөсүнө жардам берүү үчүн иштеген. 32 жашында Фернандес Мексикага көчүп барып, Grupo Modelo сыра жасаган компанияда өз ишин баштаган.
1971-жылы ал аталган компаниянын башкы жетекчиси болуп дайындалып, аны дүйнөдөгү белгилүү бренд катары тааныткан. Басылманын маалыматы боюнча учурда аталган айылда 80дей адам жашайт. Ар бир айыл тургунуна 2,6 миллион доллардан тиймекчи.
