БИШКЕК, 21-ноя. — Sputnik. Кара-Кулжа районундагы "Казык" жайлоосунда жоголуп кеткен үч чабан табылгандыгы тууралуу ӨКМден кабарлашты.
Эске салсак, 20-ноябрда Ош облусунун Кара-Кулжа районунун Кызыл-Жар жана Терек айылынын тургундары үч чабан 800 кою менен жайлоодо калып кеткенин кабарлашкан.
"Үч чабан табылды. Алардын абалы жакшы. Эки чабандын малынын тоюту жетиштүү болсо, үчүнчүсүнүкү түгөнүп калган", — деп айтылат маалыматта.
Белгилей кетсек, чабандар менен байланыш жок болгондугуна байланыштуу издөө иштери куткаруучулар тарабынан жүргүзүлгөн.
