БИШКЕК, 10-ноя. — Sputnik. Токтогул Сатылганов атындагы улуттук филармонияда Кыргыз киносунун 75 жылдыгы белгиленет. Бул тууралуу Маданият, маалымат жана туризм министрлиги кабарлады.
Билдирүүгө ылайык, иш-чара үстүбүздөгү жылдын 17-ноябрына белгиленген.
"Улуттук филармонияда кыргыз кинематографисттеринин жетишкендиктери тууралуу көргөзмө уюштурулуп, кыргыз киносунун тарыхы тууралуу тасма көрсөтүлөт. Мындан сырткары, конокторго концерттик программа тартууланат", — деп жазылат маалыматта.
Белгилей кетсек, 1941-жылы 17-ноябрда Фрунзе шаарында алгачкы киностудия ачылган.
