БИШКЕК, 10-ноя. — Sputnik. Президент Алмазбек Атамбаев Баткен облусунун Чоң-Кара айылындагы мектептин ачылыш аземине катышып, 300 миң сомдук сертификат тапшырганын өлкө башчынын маалымат кызматы билдирди.
Өз сөзүндө мамлекет башчысы Баткен облусуна мурда бир келишинде жергиликтүү тургундар ушул айылда мектеп куруп берүү өтүнүчү менен кайрылганын эскертти.
Атамбаев президенттик ыйгарым укуктарынын мөөнөтү аяктаганча айтылган өтүнүчтөрдү жана айылдын көйгөйлөрүн чечүүгө бардык күч-аракетин жумшай турганын белгиледи.
"Келерки жылдын аягына чейин Кыргызстанда бир да авариялык абалдагы мектеп болбойт. Ошону менен бирге жолдорду куруу жана сугат суулары менен камсыздоо маселелери да чечилет", — деди мамлекет башчысы.
Президент мындан тышкары Бүргөндү массивин өздөштүрүү боюнча аткарылып жаткан иштерге токтолду. Анын айтымында, Баткен облусу айыл чарба багытындагы сугат жерлеринин аянтын көбөйтүүгө муктаж.
Иш-чаранын аягында Алмазбек Атамбаев мектептин ачылышы менен айыл тургундарын куттуктап, окуу жайдын керектөөсү үчүн 300 миң сомдук сертификат тапшырды.
