Курсан Асанов менен Сүйүн Өмүрзаковдун министр болуу дымагы күчпү?
"Ачык саясат" гезити 28-октябрда чыккан санында Курсан Асанов менен Сүйүн Өмүрзаков министр болуу үчүн өз ара тымызын тирешке өткөнүн жазды.
"Эми булар "ИИМ меники" дегендей эле тымызын тирешке өтүшүптүр. Максаттары бирдей, министр болуш керек. КСДП үчүн жанын беришкен. Ички курам болсо "эми булардын тиреши" эмне менен аяктайт?" деп күтүп отурушат", — деп жазат аталган гезит.
"Бүгүнкү күндө ички иштер министрлигинин жетекчилеринин арасында — министр, биринчи орун басар, орун басарлардын ортосунда кызмат талашуу боюнча маселе жок. Муну атайын чыгарылган маалымат катары эсептейбиз. Аны далили жок, эки жетекчини кайраштырганга багытталган материал деп баалап жатабыз", — дейт Сеитов.
Сеитов ЖМКларга жарык көргөн жаңылыкты интригалык маалымат катары баалашканын айтты.
Төрөбаев Текебаевдин "кошелегубу"?
"Багыт.kg" гезити 26-октябрда чыккан санында Жогорку Кеңештеги "Өнүгүү — Прогресс" фракциясынын лидери Бакыт Төрөбаев Өмүрбек Текебаевдин "Сентябрь" телеканалын каржылап жаткан кези экен деп жазып чыкты.
"…"балапан" Төрөбаев Текебаевдин "Сентябрь" телеканалына демөөрчүлүк кылып жаткан кези экен. Мындай жылуу достук былтыркы парламенттик шайлоонун алдында башталган дешет билгендер", — деп жазат аталган гезит.
"Өнүгүү — Прогресс" фракциясынын катчылыгынан бул маалыматтын чындыкка дал келбей турганын айтышты. Фракция өкүлдөрү мындай ушак-айыңдар шайлоонун алдында көбөйө турганын баса белгилешти.
