БИШКЕК, 26-окт. — Sputnik. Жалал-Абаддын Сузак районунда 25 жаштагы жаранды коюп, окуя болгон жерден качып кеткен айдоочу бир күндөн кийин кармалды. Бул тууралуу ИИМ билдирди.
Маалыматка ылайык, кырсык кечээ, 25-октябрь күнү болжол менен саат кечки сегизде Масадан айылында болгон.
Жабыркаган кыз аймактык ооруканага жеткирилген. Ал эми айдоочу изин жашырууга үлгүргөн.
Милициянын аракети менен аталган айдоочу эртеси кармалып, анын Таш-Булак айылынын тургуну экени аныкталган. Алгач кырсыкка эч кандай тиешеси жок экенин айтып, далилдер келтирилгенден кийин мойнуна алууга аргасыз болгон.
Учурда унаа айып короого токтотулуп, териштирүү иштери башталды.
