БИШКЕК, 24-окт. — Sputnik. Жакынкы күндөрү Бириккен Араб Эмирлигинде "Акылдуу" деп аталган мечит пайда болот. Долбоор Дубайдагы маалыматтык технологиялар көргөзмөсү учурунда "Honeywell" компаниясы тарабынан тааныштырылгандыгын КР муфтиятынан билдиришти.
Система мечит ичиндеги климатты контролдоп, ошондой эле намаздын так убакытын автоматтык түрдө аныктап берет.
"Аталган система тесттик текшерүү максатында Шаржа шаарындагы Аль-Тавба мечитинде колдонулуп, алты айдын ичинде өзгөчө натыйжалуулугун көрсөттү. Жыйынтыгында мечит энергиялык керектөөнү 37 пайызга кыскарткан. Системанын максаты ал дароо автоматтык түрдө мечиттеги GPS-координаттарды колдонуу менен убакытты өзү аныктап, намаз алдында температураны жөнгө салат", — деп жазылат маалыматта.
Мындан сырткары, намаздан кийин муздатуу системасы автоматтык түрдө өзү өчөт. Ушундай жагдай менен система энергияны үнөмдөй алат.
