11 медаль. Кыргызстандык спортчулар Кипрде өткөн эл аралык мелдештен 11 медаль менен кайтып келди. Алардын бешөө алтын, төртөө күмүш, экөө коло экен.
Дем алыштагы адреналин. Айрымдарыбыз дем алышта жамбаштап жатып эс алсак, кээ бир кишилер шаардын чекесине чыгып темир тулпарларын аңгыл-дөңгүл жерлерден айдап, ылайга да салып көрүштү. Бетине чейин ылай болгонуна карабай сүйүнгөн көрөрмандар да болду.
Атактуулар кантти. Карапайым кишилер колунан келишинче дем алыш күнүн көңүлдүү жана эсте калгыдай өткөрүүгө аракет кылышса, эл оозуна алынып калгандар кантти. Мисалы, Акылбек Жапаров, Жанар Акаев, ырчылар — Жийдеш жана Мирбек кантип эс аларын бул жактан окуңуздар.
Роза гүлү, тартып мени өзүңө… "Роза гүлү", "Кыздын сыры" деген ырларды баарыбыз эле билсек керек. (Менин курагымдагылар бул ырларды кыңылдап ырдап калдык — автор.) Анан жөн элдин сүймөнчүк ырчысы Айчүрөк Иманалиева чыгармачылыгындагы эсте калган учурларды эстеди. Сиз да 90-жылдарга бир сапар алыңыз.
Алтын санаасы. Акыркы алты жылда Кыргызстандын өзүндө өндүрүлгөн зер буюмдардын көлөмү бир кыйла азайганын Финансы министрлиги коңгуроо кылып кагууда. Сырттан кирип жаткан зер буюмдардын көлөмү тонналап өсүптүр.
Инфаркттан аман калса болот. Жүрөк жана нерв ооруларынан алыс болом десеңиз дене тарбия көнүгүүлөрүн такай жасоо керектиги сунушталат. Андыктан ден соолукка кам көрүүнү азыртан баштаңыз.
Валюта наркы. Бүгүн сомдун баасы долларга карата орто эсеп менен 68.28 (сатып алуу) жана 68.37 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 36.50 сом, Аи-95 үлгүсүндөгү бензин 39.00 сом, ал эми дизель майы 34,50 сомдон сатылууда.
Соңку сөз ордуна: Бардык жасаган ишибизди ийгилик коштосун! Саламым менен Расул Үсөналиев
