БИШКЕК, 22-окт. — Sputnik. World Justice Project эл аралык укук коргоо уюму укук жаатында дүйнөлүк рейтингин жарыялап, анда Кыргызстан 83-орунга илинген.
Былтыркы жылдын көрсөткүчү боюнча Кыргызстан Россия жана Түркия өлкөлөрүн артка калтырып эки тепкичке көтөрүлгөн. Ал эми Иран Кыргызстандан үч баскычка төмөн жайгашса, Россия бул жылы алты көрсөткүчкө төмөн түшүп кеткен. Түркия мамлекети 8 баскычка ылдыйлап, 99-орунга илинген.
Рейтингдин башын Дания өлкөсү ээлеп, алдыңкы беш орунга Норвегия, Финляндия, Щвеция жана Нидерландия татыган.
Эң начар баа Афганистан, Камбоджа жана Венесуэла өлкөлөрүнө берилди.
World Justice Project уюмунун изилдөөчүлөрү өлкөлөрдөгү коррупциянын деңгээли, бийликтин ачык-айкындуулугу, негизги укуктун корголушу, тартип жана коопсуздук, мыйзамды сактоо, укуктук адилеттүүлүк сыяктуу критерийлерди эске алып, 113 өлкөнү иликтеп чыккан.
