БИШКЕК, 15-окт. — Sputnik. Ош шаарындагы дүкөндөрдүн жанында отурган жергиликтүү тургунга кол салып, колуна, ичине эки, табарсыгына эки ирет бычак уруп, учурда шаардык убактылуу кармоо жайында отурган адамдын баш коргоо чарасы бүгүн каралат. Бул туурасында Ош шаардык ички иштер башкармалыгынын маалымат кызматынын өкүлү Замир Сыдыков кабарлады.
Милициянын маалыматында күйөөсүнө капыстан кол салганда болушкан аял да тепкиге кабылып, окуяга күбө болгон майып адам ур-соккуга алынгандыгы айтылат.
Окуя болгон жерге келген Кайгуул милициясынын кызматкерлери аны шаардык ИИБге алып келгенде, ал мындай кадамга биринчиден, мас болуп баргандыгын, экинчиден, өч алуу максатында жасаганын айткан.
"Тагыраагы 2015-жылдын 20-декабрында Ош шаарында автокырсык катталып, анда бир аял жана эркек киши каза болгон. Ал бала "өлгөндөр менин ата-энем, рулда азыркы киши отурган, мен өч алдым деп айткан", — деп билдирди Сыдыков.
Ал дароо Ош шаардык ИИБдин убактылуу кармоо жайына киргизилген.
"Бүгүн түштөн кийин убактылуу кармоо жайында отурганына 48 саат болот, түштөн кийин анын баш коргоо чарасын өзгөртүү же өзгөртпөө үчүн Ош шаардык сотуна алып барабыз", — деди Ош шаардык ИИБ өкүлү.
Бул боюнча Кылмыш Кодексинин 104-беренесинин негизинде ("Денеге атайылап оор залал келтирүү") кылмыш иши козголгон.
Маалыматтарда ал адамдар кошуна экени, көп кабаттуу бир үйдө жашай турганы айтылат.
ИИМ өкүлү шектүү катары кармалган баланын айткандары атайын органдар тарабынан иликтене тургандыгын билдирди.
Сыдыков жабырлануучунун абалы оор болгондуктан, азыр көрсөтмө алууга мүмкүн болбой жаткандыгын кошумчалады.
