Кыргызстандык оор атлетчи Иззат Артыковдун машыктыруучусу Үсөнкан Майназаров Эл аралык федерация Рио Олимпиадасында болгон окуяны эми гана расмий чыгарып жатканын айтат.
"Оор атлетика боюнча эл аралык федерация 18-августта болгон нерсени азыр чыгарып жатат. Ал жерде федерациядан дисквалификация кылынды деп жазылган жок. Уюм болгону Рио Олимпиадасында ушундай окуялар болуп кеткени тууралуу гана билдирип жатат. Алар бүгүнкү күнгө чейин бул боюнча маалымат чыгара элек болчу. Эски маалыматтарды гана чыгарып жатат", — дейт Майназаров.
Машыктуруучу ошондой эле бүгүнкү күнү соттук териштирүү болуп жатканын айтып, адвокаттарга керектүү документтер жиберилгенин кошумчалады.
Эске салсак, Оор атлетика боюнча эл аралык федерация Рио-де-Жанейродо өткөн Олимпиадалык оюндардан төрт спортчу четтетилгенин маалымдаган.
