БИШКЕК, 14-окт. — Sputnik. Дүйнөлүк туристтик уюм 2018-жылы өтө турган Көчмөндөрдүн III оюндарын Кыргызстан менен кошо өткөрүшмөй болду. Бул тууралуу Монголияда өтүп жаткан Көчмөн туризм жана Жибек жолундагы шаарларды туруктуу өнүктүрүү боюнча аталган уюмдун жыйынында белгилүү болду.
Иш-чарада Кыргызстандагы туризмди араб өлкөлөрүнө жайылтуу, Монголия менен Кыргызстандын көчмөн цивилизациясынын бирдиктүү туристтик өндүрүмүн түзүү маселелери талкууланды.
"Дүйнөлүк туристтик уюм 2018-жылы өтө турган Көчмөндөр оюндарын кошо өткөрүшүүгө даяр экенин билдирди. Бул Кыргызстан үчүн ири колдоо жана Көчмөндөр оюндарын глобалдуу деңгээлге алып чыгууга чоң мүмкүнчүлүк берет", — деп айтылат министрлик тараткан маалыматта.
Дүйнөлүк туристтик уюм БУУнун туристтик саясатын жүргүзгөн атайылаштырылган мекеме. Ага 157 мамлекет мүчө болуп, 32 аймак кирген.
