БИШКЕК, 12-окт. — Sputnik. Кыргыз өкмөтү Максим Бакиевден Лондондун жогорку соту аркылуу өндүрүп алуу үчүн берген доосун чакыртып алышы боюнча түшүндүрмө берди.
Аталган борбордун тараткан билдирүүсүнө ылайык 2016-жылы 5-апрелде КР өкмөтүнүн сот өкүлчүлүгү борбору КР Социалдык фондусунун жана "Кыргызстанды өнүктүрүү фондусунун" атынан Лондондун Жогорку сотуна айпыталуучулардан келтирилген зыянды өндүрүп берүү боюнча арыз менен кайрылган. Жоопкерлердин катарында Максим Бакиев жана "АзияУниверсалБанк" ААКтын директорлор кеңешинин мурдагы төрагасы Михаил Надель бар. Доо арыз Социалдык фонд менен "Кыргызстанды өнүктүрүү фондунун" депозиттерин "АУБга" алынышы боюнча берилген.
"2015-жылы 5-сентябрда Лондондун Жогорку соту Наделге каршы КР Социалдык фондуна жана "Кыргызстанды өнүктүрүү фондуна" келтирген зыяны үчүн чечим чыгарган. Демек бул аталган эки мекеменин Наделден келтирилген зыяндарды эч кандай чыгымы жок талап кылууга жол берет. Кыргызстан Максим Бакиев "АзияУниверсалБанк" ААКты банкротко чейин жеткирген деген пикирди карманат. Бул кадам Кыргызстанга да терс таасирин тийгизген", — деп айтылат маалыматта.
Иштин токтотулушу боюнча билдирүү Кыргызстанга зыян келтирбегидей жасалганын сот өкүлчүлүгүнөн кабарлашты.
"Кээ бир процессуалдык учурлар такталгандан кийин бул багытта иш улантылат. Кыргызстандын баамында анын жыйынтыгы жакшы болот. Кыргызстандын мамлекеттик органдарынын доосун чакыртып алышы, Максим Бакиевдин сотто утту дегенин түшүндүрбөйт", — деп жазылат таратылган билдирүүдө.
2013-жылы Бишкек шаарынын Биринчи Май райондук соту мурдагы президенттин баласы Максим Бакиевди КР кылмыш жаза кодексинин үч беренеси боюнча айыптуу деп таап, мүлкүн конфискациялоо менен 25 жылга кескен.
Ал эми 2014-жылы октябрда Биринчи Май райондук соту Максим Бакиевди "АзияУниверсалБанкынан" каражат чыгарып кеткени үчүн өмүр бою эркинен ажыраткан.
Учурда Максим Бакиевдин Лондондо экени маалымдалат.
