Бейпилдиктен, бейкуттуктан өтөр эч нерсе жок. Мекениң тынч болсо, үй-бүлөң да тынч. Акыркы учурда чет элдик бир катар элчиликтердин октябрь айы кандуу болушу мүмкүн деген эскертүүлөрү жөнөкөй жарандарды түйшөлтүп турган чагы. Бул туурасында адистер, сактансам сактайм дейт, бирок анча дүрбөлөңгө түшүүнүн кереги жок, күч структуралары иштеп жатат маанайда жооп айтышты. Айтор, аманчылык болсунчу.
Экс-президентке эч ким тийишкен жок! Экс-президент Роза Отунбаева мамлекеттик резиденцияда жашап жатканын КР президентинин иш башкармалыгынын жетекчиси Туруспек Коеналиев Sputnik Кыргызстан агенттигине билдирди. Буга чейин резиденциядагы үйүнөн чыгарылды деген кеп-сөз тараган.
Кыргызстанда ММА Федерациясы ачылды. Буга арналып атайын турнир өттү. Эл арасында аралаш мушташ деп аталган спорттун бул түрү акыркы жылдары Кыргызстанда да кеңири жайылууда. Кечээ кечинде турнирде бир нече өлкөлөрдөн келген спортчулар билек күчүн сынап, алдуулары атаандашып алып жыкты.
Ай-ай-ай, министр мырза, кыздарга тийишкен жакшы эмес. "Кыргыздын тал чыбыктай кыздарды ажаткана тазалап жүрөт, Кыргызстандын келечеги бүдөмүк" деген маанайда мурун көтөргөн казак министри кыз жандуулугунун айынан чырдын чордонунда калды. Ычкырына алы жетпей калганбы же чын эле өзү айткандай каралоо кампаниясы башталдыбы, айтор, Арыстанбек Мухамедиулынын азыр кулагы кызарып турган чагы.
Чоң ата керээзин аткарган небере. Кыргыз күүсүн чоочун жерде жаңыртып, аларды суктандырган, бир үй-бүлөнүн жалгыз уулу, чоң атасынын керээзин жерде калтырбаган азамат бала 21 жаштагы Темирлан Назарбек туурасында бул жерден окуйлу.
"Одноклассники" жаңыланды, күтүп тургула. Эми интернет жандуулар үчүн кызыктуу жаңылыкты бөлүшөлү. "Одноклассники" социалдык тармагы "Группалар үчүн билдирме" деген жаңы сервистин анонсун жарыялады. Анда колдонуучулар баракчалар менен группаларга билдирме жөнөтө алышат экен. Бирок бул бир айдан кийин элге тартууланат дешти.
Курултайлардын кунун кетиргендер кимдер? Акыркы жылдары курултайлар байма-бай өтүп, элдин атынан сүйлөгөндөр көбөйдү. Деги эле курултай деген эмне? Бул туурасында Исмаил Мамытов жиликтеп чыкты.
Валюта наркы. Бүгүн сомдун баасы долларга карата орто эсеп менен 68.44 (сатып алуу) жана 68.62 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 36.50 сом, Аи-95 үлгүсүндөгү бензин 35.50 сом, ал эми дизель майы 33 сомдон сатылууда.
Соңку сөз ордуна. Айылы бүтүн аман жүрөт.
Аманчылык, ийгилик жана жакшы маанай каалап, Нургүл Максутова
